Working Group Minutes / Canola / 28 November 2018

Notule

Canolawerkgroepvergadering
gehou te La Dolce Vita, Morreesburg, op 28 November 2018

  1. Opening

    Mnr Gerhard Keun open die vergadering met gebed.

  2. Verwelkoming

    Die Voorsitter, Mnr GJH Scholtemeijer, heet die teen­woordiges welkom by die laaste Canolawerkgroep­vergadering van 2018.

  3. Presensie

    Teenwoordig

    Mnr GJH Scholtemeijer Voorsitter
    Prof A Agenbag PNS
    Mnr K Blanckenberg Graan SA
    Mnr P Blom SSK
    Mnr J Botes Agricol
    Mnr N Bouwer Agricol
    Dr E Briedenhann PNS
    Mnr J Bruwer Bayer
    Mnr H Cerfonteyn DLWK
    Mnr G Conradie DLWK
    Me I Crous SOILL
    Mnr C Cumming PNS
    Dr J de Kock PNS
    Mnr G Els K2 Agri
    Mnr I Jansen van Rensburg Barenbrug
    Mnr G Keun PNS
    Dr S Lamprecht LNR-NIPB
    Mnr P Laubscher Overberg Agri
    Mnr J Loubser PNS
    Mnr C Louw Graan SA
    Mnr J McDermott Pioneer
    Mnr C Müller Agricol
    Mnr R Schutte Overberg Agri
    Mnr Z Spammer SOILL
    Dr J Strauss DLWK
    Me A Swanepoel DLWK
    Dr P Swanepoel US
    Mnr A Theron PNS
    Mnr L van Jaarsveld Overberg Agri
    Mnr DT Wessels Graan SA

    Verskonings

    Me R Beukes NDLBV
    Mnr L Coetzee Kaap Agri
    Mnr G de Bruin Kaap Agri
    Mnr J Kellerman Barenbrug
    Mnr P Lombard DLWK
    Mnr K Meintjes Corteva
    Mnr R Schoeman Corteva
    Me L Smorenburg DLWK
    Me L van Zyl Sekretariaat
  4. Personalia

    Geen.

  5. Vasstelling van die sakelys

    Die sakelys word aanvaar, sonder enige wysigings of toevoegings.

  6. Goedkeuring van notule: 28 Augustus 2018

    Die notule van die vergadering gehou op 28 Augustus 2018 word as gelese beskou en goedgekeur.

  7. Algemene oorsig

    1. SAGIS Inligting

      Kennis word geneem van die nuutste uitgawes van SAGIS se Weeklikse Bulletin en Maandelikse Data.

    2. Oesskattings

      Kennis word geneem van die data wat die Oes­skat­tingskomitee saamgestel het rakende die produsente­voornemens om somergewasse te plant in die 2018-2019 produksiejaar, en van die hersiene oppervlakte- en derde produksieskatting van wintergewasse in die 2018-produksiejaar.

    3. Winterreënvalstreek

      1. Swartland

        Daar word rapporteer dat windskade voorgekom het op Langgewens en ook in ander gebiede in die Swartland, met groter verliese wat op koring as op canola gely is. Kennis word geneem dat die Swartland oor die algemeen baie goeie canola-oeste gehad het, met min peste en plae wat voorgekom het.

      2. Suid-Kaap

        Daar word voorts rapporteer dat baie goeie canola-opbrengste behaal is in die gebiede van Bredasdorp en Caledon, ten spyte van die droë planttyd. Redelike windskade het ook in die Suid-Kaap voorgekom; terwyl die gebied wat deur Sentraal-Suid Koöperasie (SSK) bedien word 'n baie droë produksie-seisoen beleef het. Insekte het aansienlike skade aangerig. Canola het, soos in ander droë jare, beter gevaar as die ander grane.

    4. Somerreënstreek / Oos-Kaap / Ander

      Prof Agenbag rapporteer dat geen canola onder besproeiing in die somerreënvalgebied aangeplant is nie. Hy sê daar is egter redelike belangstelling in canola­produksie, veral onder die mieliesaadprodusente. Kennis word geneem dat canola aangeplant is deur 'n produsent in Chrissiesmeer, deur 'n produsent in Ermelo, en deur 'n produsent in Standerton.

      Kennis word geneem dat canola aangeplant is in die Oos-Kaap.

    5. Prysinligting

      Kennis word geneem dat die waarde van canola afgelei van sojaboonoliekoek (47% proteïen) geland in Kaapstad op 13 November 2018 soos volg daar uitsien:

      47% Proteïen teen 'n waarde van R6 017 per ton en 'n wisselkoers van R14,42 – die relatiewe waarde van volvetcanola is dus:

      Pluimvee (94%) R5 656 per ton
      Varke (100%) R6 017 per ton
      Suiwel (58%) R3 490 per ton

      Die relatiewe waarde van canola oliekoek is:

      Pluimvee (53%) R3 189 per ton
      Varke (65%) R3 911 per ton
      Suiwel (60%) R3 610 per ton
    6. Weervooruitskatting

      Mnr Cerfonteyn noem dat dit moeilik is om op die huidige stadium weervoorspellings te maak, weens die feit dat die beskikbare inligting nie betroubaar is nie.

      Daar word genoem dat daar, veral by mense wat nie direk by landbou betrokke is nie, 'n persepsie is dat die Wes-Kaap 'n goeie reënjaar beleef het, terwyl die reënval in die Swartland ver onder die langtermyngemiddeld was.

    7. Sclerotinia

      Kennis word geneem dat geen nuwe inligting bekend is oor Sclerotinia nie.

  8. Navorsing

    1. Nasionale Cultivarproewe 2018-2019

      Dr Strauss rapporteer dat gemiddelde opbrengste van 2 113kg/ha behaal is in die nasionale cultivarproewe wat in die Swartland aangeplant is, en dat die cultivar Diamond die hoogste gemiddelde opbrengs van 2 505kg/ha behaal het. Hy sê goeie opbrengste is ook behaal deur die twee nuwe TT-cultivars wat evalueer is.

      Dr Strauss rapporteer voorts dat die proefgemiddeldes in die Rûens gewissel het tussen 3 008kg/ha op Klipdale en 1 704kg/ha op Tygerhoek, met 'n gemiddelde opbrengs van 2 270kg/ha.

      Dr Strauss bevestig op navraag dat die korter groeiers as gevolg van die klimaat in die 2018-seisoen beter gevaar het.

  9. Tegnologie oordrag

    1. Canolafokus

      Kennis word geneem dat artikels oor die nasionale cultivar-proefresultate, cultivarkeuse, die beheer van insekte, vroegsaai en die bewaring van bye gepubliseer sal word in die Canolafokus.

    2. Inligtingsdae 2019

      Kennis word geneem dat die volgende inligtingsdae beplan word:

      6-7 Maart Graan SA Kongres
      12 Maart Overberg Agri Voorsaaidag
      13 Maart SKOG-Voorsaaidag
      6-7 Augustus Bewaringslandbou Wes-Kaap
      21 Augustus Riversdalse Inligtingsdag
      29 Augustus Roodebloem-inligtingsdag
      3 September Proefbesoeke: Suid-Kaap
      4 September Proefbesoeke: Swartland
      4-6 September NAMPO Kaap, Bredasdorp
      11-14 September Swartlandskou
    3. Video-opnames

      Die Voorsitter noem dat die Sclerotiniavideo heelwat aftrek gekry het, en dat ander video-opnames in die pyplyn is.

    4. Oilseeds Focus

      Neem kennis van die nuutste uitgawe van die Oilseeds Focus.

  10. Behoeftes van

    1. Die canolamark

      Geen verslaglewering.

    2. Canolaprodusente

      1. Pryse

        Kennis word geneem dat inligting oor agterskotte wat betaalbaar sal wees ingewag word.

      2. Canola opbrengskompetisie

        Die Voorsitter noem dat die canola opbrengskompetisie-prysuitdelingsfunksie na afloop van die vergadering aangebied sal word. Hy spreek die PNS se waardering uit teenoor diegene wat hulp verleen het met die kompetisie.

  11. Saad

    1. Beskikbaarheid van saad

      Kennis word geneem dat die saadmaatskappye heelwat waarde put uit die werk wat in die nasionale cultivar­evaluasieproewe gedoen word, met veral tendense wat uitgewys word in terme van korter- en langergroeiers wat as belangrik beskou word.

      Kennis word voorts geneem dat geen tekorte voorsien word sover dit saadbeskikbaarheid in 2019 betref nie.

    2. Dormansie van saad

      Kennis word geneem dat saaddormansie veral ter sprake is by teruggehoude saad.

  12. Ander sake

    1. Nuusbrokkies

      Kennis word geneem van die nuusbrokkies wat by die dokumentasie ingesluit is as deel van Bylae G.

    2. Tydskrifartikels: canola

      Kennis word geneem van die canolaverwante artikels wat by die dokumentasie ingesluit is as deel van Bylae H.

    3. Sprekers wat oorweeg word vir toekomstige Canolawerkgroepvergaderings

      1. Spreker: Mnr M Allsop

        Kennis word geneem dat Mnr Allsop genooi sal word om 'n volgende Canolawerkgroepvergadering toe te spreek oor bye.

      2. Aanbieding oor Sclerotinia: Me L Nowers, DLWK

        Kennis word geneem van die afskrif van die lesing oor Sclerotinia, wat Me Nowers tydens die vorige vergadering aangebied het.

  13. Datums van volgende vergaderings

    Kennis word geneem dat die volgende Canolawerk­groepvergadering aangebied word op 13 Junie 2019. Daarop­volgende datums van Canolawerkgroep­vergader­ings is 27 Augustus en 27 November.

  14. Afsluiting

    Die Voorsitter bedank die lede vir hul deelname tydens die vergadering. Hy noem dat hy en Dr De Kock nie meer voortaan Canola­werkgroepvergaderings sal bywoon nie, en spreek sy en Dr De Kock se waardering uit vir die samewerking en vriendelikheid wat hulle beleef het. Die vergadering word as gesluit verklaar.