Working Group Minutes / Archives / Canola / 12 April 2007

Notule

Canola- en Lupienwerkgroepvergadering

gehou op 12 April 2007 te Elsenburg



  1. Opening en verwelkoming

    Mnr Keun open die vergadering met gebed. Die Voorsitter verwelkom almal teenwoordig, veral mnre Sakkie van Zyl (GSA) en mnr Frans Potgieter (PNS Raadslid).

  2. Presensie

    Teenwoordig

    Mnr GJH Scholtemeijer PNS (Voorsitter)
    Dr M Griessel PNS
    Dr J de Kock PNS
    Mnr FAS Potgieter PNS
    Mnr G Keun PNS
    Mnr H Agenbag PNS Wes-Kaap
    Mnr P Lombard DLWK
    Mnr H Cerfonteyn DLWK
    Mnr G van Coller DLWK
    Mnr W Hoffmann DLWK
    Mnr C van Rooyen DLWK Caledon
    Dr M Hardy DLWK
    Me L Smorenburg DLWK
    Mnr P Laubscher Overberg Agri
    Mnr J Bruwer SSK
    Mnr A Haasbroek Kaap Agri
    Mnr J McDermott Du Pont
    Mnr J Loubser Nova Voere
    Mnr L van Zyl GSA
    Prof A Agenbag US
    Dr G Tribe LNR-NIPB
    Me L van Zyl Sekretariaat

    Verskonings

    Dr S Lamprecht LNR-NIPB
    Dr I Trautmann DLWK
    Mnr D Koch CBK
    Mnr JJ Bester GSA
    Mnr K Schonken CBK
    Mnr C Cumming Bayer Crop Science
    Mnr I Slabbert DLWK Moorreesburg
    Mnr G Conradie DLWK
    Mnr J Lusse Overberg Agri
    Mnr K Becker SOILL
    Mnr H Kotzé Nova Voere
    Dr T Brand DLWK
    Dr J Booysen DLWK
    Me R Beukes NDL - NOK
    Me F Hawkins NDL - NOK
    Me A Enslin SAGIS
    Me A Swanepoel DLWK
    Mnr K van Niekerk MKB
  3. Personalia

    Mnr H Agenbag word met sy verjaardag geluk gewens.

  4. Vasstelling van sakelys

    Geen nuwe sake word bygevoeg nie.

  5. Notule van die vergadering van 8 Fe­bruarie 2007

    Die notule van die vergadering gehou op 8 Februarie 2007 word as gelese beskou en goedgekeur.

  6. Algemene oorsig

    1. Winterreënstreek

      1. Canola

        Swartland / Suid-Kaap

        Die Swartland en Suid-Kaap het 'n matige somer gehad en sporadiese somerreënval het voorgekom. Daar sal binne­kort gesaai word en reën sal nou welkom wees. Weens die ongewone reënbuie gedurende die afgelope somer is daar in die Swartland probleme met die voorkoms en beheer van someronkruide soos die kanferbossie ondervind. In die Suid-Kaap waar somerreën meer gereeld voorkom, volg produsente die praktyk om meer gereeld voorsaai be­spuitings (onkruiddoders) toe te dien. Daar word aanbeveel dat die Swartland produsente ook hierdie seisoen meer voorsaai bespuitings sal moet oorweeg om die somer­onkruide effektief te beheer.

        Besluit dat landboubesighede die produsente veral in die Swartland oor die groter voorkoms en tydige beheer van somer­onkruide bewus moet maak en aanbevelings in dié verband sal doen.

        Landboubesighede

        Suidwestelike Distrikte

        Geen inligting word rapporteer nie.

        Oos-Kaap

        Geen inligting word rapporteer nie.

      2. Lupiene

        Alhoewel meer lupienaanplantings verwag word, is daar nog geen sekerheid omtrent die beoogde aanplantings nie.

        Landboubesighede

    2. Somerreënvalstreek

      Geen verdere inligting (canolaverbouing) is beskikbaar nie.

    3. Weervooruitskatting

      Mnr Cerfonteyn verskaf die weervooruitskouing vir die periode April tot Julie 2007. Gemiddelde reënval tot Junie word voorspel. Op die oomblik lyk dit of meer reën vir die tweede deel van die winter verwag kan word.

    4. Oesskatting

      Neem kennis dat daar volgens die NOK se produksie­skatting vir die 2007seisoen (eerste voorneme om te plant) verwag word dat 40 000ha canola en 18 000ha soetlupiene aangeplant sal word.

      Canola

      Volgens die landboubesighede word daar minder aanplant­ings in die Swartland verwag as gevolg van die swak opbrengste die vorige seisoen. (Ongeveer 35% van die koringopbrengs van die gebied). In die SSK en Overberg Agri gebiede word meer aanplantings verwag (opbrengste is ongeveer 40–50% van die koringopbrengs). Weens die swakker opbrengs en risiko verbonde aan canolaverbouing skram produsente daarvan weg. Die langtermyn voordele van canola binne 'n wisselboustelsel moet egter nooit uit die oog verloor word nie.

      Die swak opbrengs van canola kan gedeeltelik aan die gebruik van teruggehoude saad asook oespraktyke toe­geskryf word. Omdat canola nie altyd deur produsente as 'n volwaardige gewas gereken word nie, word daar nie die nodige aandag aan die oesproses gegee nie, wat onnodige oesverliese tot gevolg het. Oesverliese van 300–500kg/ha kan voorkom. Canola moet byvoorbeeld verkieslik vroeg in die oggend of laatmiddag geoes word.

      Die temperatuur verskille in die Swartland (veral tydens blom en korrelvulling wanneer droë warm weer voorkom) het ook 'n invloed op die opbrengs van canola.

      Daar word besluit dat

      • die noodsaaklikheid van korrekte oesmetodes vir canola om veral saadverliese te beperk weer aan produsente gekommunikeer moet word;
      • die kommer omtrent onnodige oesverliese en die oorweging van verdere maatreëls hoe dit beperk kan word na die Tegnologie­komitee vir bespreking verwys moet word.

      Landboubesighede
      Tegnologiekomitee

      Verwys ook punt 7.7 van hierdie notule.

      Lupiene

      Daar word aanbeveel dat die moontlikheid van waarde­toevoeging tot lupiene oorweeg moet word. Ontdopping van lupiene kan die waarde van lupiene tot 30% verhoog. Dit is onseker of ontdopte lupiene net vir akwakultuur en menslike gebruik aangewend word en of dit ook in die veevoermark gebruik word.

      Daar word besluit dat

      • Dr De Kock sal vasstel of ontdopte lupiene in die Australiese veevoermark gebruik word en watter inligting in hierdie verband beskikbaar is;

        Dr De Kock

      • Dr Griessel ondersoek na die beskikbaarheid van ontdoppingsfasiliteite in Suid-Afrika sal instel en aanbevelings aan die Werkgroep sal maak.

        Dr Griessel

    5. SAGIS Inligting

      Die jongste markinligting soos deur SAGIS verskaf is vir kennisname by die sakelys aangeheg.

      Daar word kennis geneem dat die CBK SAGIS se voorge­stelde berekening van die invoerpariteitsprys oorweeg en aanvaar het.

      Besluit dat reëlings vir die bekendmaking van die invoer­pariteitsprys vir canola met SAGIS getref sal word.

      Voorsitter
      S van Zyl

      Daar word verder kennis geneem dat die CBK in oorleg met rolspelers 'n prysmodel vir die berekening van die canola­prys ontwikkel het.

      Daar word besluit dat die prysmodel soos deur CBK ontwikkel ter inligting by die volgende sakelys aangeheg moet word.

      S van Zyl

      Die vergadering besin oor die rede hoekom die canolaprys (oliesaad) teen dieselfde tempo as dié van die koringprys (graangewas) aangepas word en hoekom daar 'n beter prys vir sonneblom as vir canola gerealiseer word.

      Daar word besluit dat mnr Van Zyl versoek word om die prysbepalingsnorm vir canola in vergelyking met koring of sonneblom te ondersoek en aan die Werkgroep terug­voering te gee.

      S van Zyl

    6. Prysvooruitskatting en Internasionale Mark­inligting

      Dr Griessel rapporteer oor die internasionale marksituasie. Daar word verwag dat hoër sojaboonpryse oor die lang­termyn sal realiseer. Mieliepryse het aansienlik gestyg omdat baie mielies vir etanol vervaardiging gebruik word.

      Die jongste gelande prys van sojaboon-oliekoek (47% proteïen) in Kaapstad op 10 April 2007 beloop R2 223/ton. Wisselkoers R7,15/$1.

      1. Die afgeleide waarde van volvet canola is soos volg:

        Pluimvee (94%) R2 090
        Varke (100%) R2 223
        Suiwel (58%) R1 289

        Die relatiewe waarde van canola oliekoek is dus soos volg:

        Pluimvee (53%) R1 178
        Varke (65%) R1 445
        Suiwel (60%) R1 334
      2. Die relatiewe waarde van lupiene is soos volg

        L. albus (Esta) Pluimvee (75%)
        Suiwel (80%)
        R1 667
        R1 778
        L. angustifolious (Merrit) Pluimvee (53%)
        Suiwel (52%)
        R1 178
        R1 156
        L. luteus (Juno) Pluimvee (63%)
        Suiwel (73%)
        R1 400
        R1 623
      3. Produsentepryse vir canola

        SOILL het die volgende pryse vir die 2007/2008 seisoen afgekondig:

        Minimum prys R2 200 / ton
        Vaste prys R2 280 / ton
        Finale prys R2 360 / ton

        Volgens inligting sal Canola Saad produkte (voorheen Murray Voere) soortgelyke pryse aanbied.

      4. Produsentepryse vir lupiene

        Geen pryse vir lupiene is beskikbaar nie.

  7. Navorsing

    1. Canola

      1. Nasionale cultivarproewe

        1. Cultivarproewe Wes- en Suid-Kaap: resultate 2006 en aanplantings 2007

          Neem kennis en besluit dat die resultate van die 2006 ontledings ten opsigte van olie- en ru-proteïeninhoud van canola aan die vergadering rapporteer sal word wanneer dit beskikbaar is.

          Mnr Lombard

          Neem verder kennis dat voorbereidings vir die 2007 aanplantings in plek is en vordering by 'n volgende vergadering rapporteer sal word.

          Mnr Lombard

          Daar word kennis geneem dat mnr Lombard en dr Nel in die proses is om die faktore wat 'n rol op olie-inhoud kan speel, as 'n artikel voor te berei.

          Mnr Lombard

          Besluit dat die artikel oor die faktore wat 'n rol op olie-inhoud van canola kan speel by die volgende sakelys aangeheg sal word.

          Mnr Lombard
          Dr Nel

        2. Canola cultivaraanbevelings onder be­sproeiing in die somerreënval gebied

          Geen verdere inligting is beskikbaar nie.

          Besluit dat die resultate van die 2006 cultivarproewe in die somerreënval area onder besproeiing (olie- en proteïen­opbrengs in vergelyking met die verskillende temperature ingesluit) by die volgende sakelys aangeheg sal word.

          Dr Nel

      2. Bemesting

        1. Terugvoering vanaf Bemestingtaakspan

          Neem kennis dat die artikel (populêre publikasie) oor stik­stofbemesting (Prof Agenbag se projek by die Universtiteit Stellenbosch) nog uitstaande is.

          Besluit dat die populêre publikasie oor stikstofbemesting in die Canolafokus en SA Graan gepubliseer moet word wanneer dit gereed is.

          Prof Agenbag
          Redaksie
          Mnr Van Zyl

          Daar word verder besluit dat die CBK versoek word om toe te sien dat die huidige bemestingsriglyne jaarliks tydens die Voorsaai Inligtingsdae aan produsente gekommunikeer word.

          S van Zyl
          D Koch

          Neem kennis en besluit dat die ontleding van grond- en blaarmonsters tydens die volgende seisoen deur Prof Agenbag gedoen sal word (Projek: "N-bemesting van canola gebaseer op N-mineralisasie en loging") en die resultate aan die einde van die seisoen rapporteer sal word.

          Dr Nel
          Prof Agenbag
          Dr De Kock

          Dr De Kock rapporteer dat die moontlikheid van die hervatting van navorsingswerk deur YARA met hulle opgevolg is. Weens praktiese probleme sal dit nie binnekort vir hulle moontlik wees nie. Besluit dat Dr De Kock met YARA in verbinding sal bly en enige verwikkeling omtrent navorsingswerk sal rapporteer.

          Dr De Kock

        2. Wisselbou-projek somerreënval gebied

          Neem kennis en besluit dat die amptelike resultate van die wisselbou-projek in die somerreënval gebied afgewag word.

          Dr Nel

      3. THRIP-befondsing

        Prof Agenbag rapporteer dat die terugvoering op die aansoek om THRIP-befondsing (Departement Handel en Nywerheid se "Technology and Human Research for Industry Programme") vir canola-navorsingsprojekte in die Wes-Kaap afgewag word. Terugvoering sal rapporteer word.

        Prof Agenbag

      4. Saadbehandeling teen swamme en insekte by canola

        Neem kennis van die volgende artikels wat ter inligting by die sakelys aangeheg is:

        "Effect of chemical seed treatment on the germination and seedling vigour of canola" – RJ de Villiers, GA Agenbag en SC Lamprecht.

        "Effect of chemical seed treatment, seeding rate and row width on plant populations and yield of canola" – RJ de Villiers en GA Agenbag.

        Neem verder kennis en besluit dat vordering ten opsigte van die aansoek vir registrasie van Cruiser vir gebruik op canola opgevolg en aan die vergadering rapporteer sal word.

        PNS Sekretaris

    2. Lupiene

      1. Nasionale cultivarproewe: resultate 2006 en aanplantings 2007

        Neem kennis en besluit dat die resultate van die 2006 olie- en proteïeninhoud van lupiene in die Wes- en Suid-Kaap aan die vergadering rapporteer sal word wanneer dit beskikbaar is.

        Mnr Lombard

        Neem verder kennis dat voorbereidings vir die 2007 aanplantings in plek is en vordering by 'n volgende vergadering rapporteer sal word.

        Mnr Lombard

    3. Weerstandbiedende raaigras

      Besluit dat die terugvoering insake die navorsingstrategie vir raaigrasweerstandbiedendheid vanaf die DLWK afgewag word.

      Me Swanepoel

      Mnr McDermott rapporteer oor die afloop van die simposium oor onkruiddoderweerstand wat gedurende Maart gehou is. Neem kennis dat Agri Wes-Kaap (Mnr Opperman) onderneem het om die moontlikheid van koördinering van alle aktiwiteite rondom onkruiddoder­weerstand met DLWK (Mnr Dowry en Dr Trautmann) op te volg. Daar is aanbeveel dat die proses as 'n projek geregistreer moet word.

      Besluit dat terugvoering oor die koördinasie van onkruid­doderweerstandbiedenheid afgewag word. Mnr Cumming sal dit met Agri Wes-Kaap opvolg.

      Mnr Cumming

    4. Pes- en plaagbeheer

      1. Swartstam op canola

        Neem kennis dat mnr Van Coller aan die begin van 2008 gaan registreer vir sy doktorsgraad (swartstam op canola) by die Departement Plantpatologie, US. Intussen gaan hy voort met die navorsingsprojek "Characterisation and pathogenicity of Leptosphaeria spp associated with blackleg of canola in the Western Cape Province". Die projek vorm deel van sy beplande studies vir sy doktorsgraad, en strek van 2005 to 2008 en word deur DLWK befonds. In die projek word daar gefokus om te bepaal watter rasse van die patogeen in elk van die verskillende streke binne die Swartland en Suid-Kaap voorkom. Die resultate van die projek sal bydra om 'n pro-aktiewe benadering ten opsigte van die beheer van swartstam te ontwikkel, aangesien die rasverspreiding van die patogeen sal bepaal watter cultivars die beste geskik is vir weerstandbiedendheid teen swartstam in verskillende streke van die Wes-Kaap.

        Besluit dat Mnr Van Coller terugvoering sal rapporteer soos die navorsing oor die rasverspreiding van die swartstam patogeen vorder.

        Mnr Van Coller

        Neem kennis dat Mnr Van Coller die oorsprong van swartstam wat die afgelope seisoen op blomkool in die Greyton omgewing voorgekom het sal opvolg indien moontlik. Terugvoering sal rapporteer word.

        Mnr Van Coller

      2. Monitering van insekte op canola

        1. Slakke

          Neem kennis dat die monitering van slakke in 2007 herhaal sal word (Dr Tribe se projek: "Insect and other pests of canola").

          Besluit dat die waarnemings ten opsigte van die voorkoms van slakke deur die loop van die seisoen aan die Werk­groep rapporteer sal word.

          Dr Tribe

        2. Stamboorders

          Neem kennis dat die artikel "Cabbage stem weevil "ter inligting by die sakelys aangeheg is. Die monitering van stamboorders sal gedurende die 2007 seisoen herhaal word.

          Besluit dat waarnemings ten opsigte van die voorkoms van stamboorders deur die loop van die seisoen aan die Werkgroep rapporteer sal word.

          Dr Tribe

          Daar word navraag gedoen omtrent die moontlike verband tussen stamboorders en die voorkoms van Swartstam op canola plante. Volgens inligting is daar resultate in dié verband beskikbaar (Me M Kellerman se navorsingsprojek).

          Besluit dat Mnr Van Coller vorige navorsingsresultate sal opvolg en vasstel of daar enige verband tussen stam­boorders en die voorkoms van Swartstam op canola is. Terugvoering sal aan die Werkgroep rapporteer word.

          Mnr Van Coller

        3. Ruitrugmot

          Neem kennis en besluit dat die voorkoms en vlugpatrone van die ruitrugmot deur die loop van die seisoen ge­moniteer sal word. Dr Tribe sal waarnemings aan die Werkgroep rapporteer.

          Dr Tribe

          Daar word ook aanbeveel dat mnr Agenbag in oorleg met Dr K Laubscher (navorsingsprojek by DLWK) die moont­likheid moet oorweeg of en hoe 'n samevatting van die inligting wat uit die streke aan hom voorsien word byvoorbeeld oor die beweging van ruitrug- en bolwurm­motte as voorkomingsmaatreël aan produsente gekom­munikeer kan word. Mnr Agenbag sal die saak opvolg en met Dr Tribe oor verdere optrede konsulteer.

          Mnr Agenbag
          Dr Tribe

    5. Biobrandstowwe

      Neem kennis dat die Regering se beleid ten opsigte van die vervaardiging van biobrandstowwe nog afgewag word.

      Besluit dat vordering met onderhandelings en die afkondiging van die Regering se beleid ten opsigte van biobrandstofvervaardiging aan die bedryf gekommunikeer sal word.

      Dr Troskie
      Voorsitter

    6. Voorkoms en beheer van sclerotinia

      Neem kennis en besluit dat daar met 'n kenner oor Sclerotinia gereël sal word om per geleentheid meer toeligting oor die siekte aan die Werkgroep te verskaf.

      Voorsitter

    7. Super Canolakompetisie

      Die verslag van die Swartland Canolakompetisie is by die sakelys aangeheg.

      Daar word kennis geneem dat mnr André Brink as die wenner in beide kategroieë (hoogste opbrengs en bruto marge) aangewys is. Mnre Deon Steyn en Dirk Lesch was die naaswenners vir onderskeidelik opbrengs en bruto marge.

      Daar word weereens verwys na die verskille tussen die (kompetisie) deelnemers se canola opbrengs as persentasie van die gemiddelde koringopbrengs en wat die rede daarvoor sou wees.

      Besluit dat mnre Van Rooyen en Slabbert versoek word om waar moontlik meer agtergrond oor die canola opbrengs as persentasie van die koringopbrengs van die kompetisie deelnemers te verskaf sodat bepaal kan word wat die moontlike redes vir die swak opbrengs kan wees (byvoorbeeld die rol wat teruggehoude saad of verkeerde oestegnieke kan speel), en hoe die tekortkominge aangespreek moet word. Verwys ook punt 6.4 van hierdie notule.

      I Slabbert
      C van Rooyen

      Daar word weer kommer uitgespreek oor die risiko wat die gebruik van teruggehoude saad vir gewasproduksie inhou. CBK verteenwoordigers rapporteer dat die CBK ook hieroor sowel as oor die saadsuiwerheid van gesertifiseerde saad bekommerd is. Die landboubesighede is die mandaat gegee om die saak namens die produsente te ondersoek en hulle is in die proses om monsters van beskikbare gesertifiseerde saad te neem en te toets. Die resultate daarvan sal met die saadmaatskappye opgevolg word (koördineerder: Mnr A Haasbroek).

      Daar heers ook kommer oor die pitgrootte. Die CBK beveel aan dat saad aan 'n minimum pitgrootte van 1,4mm tot 1,8mm in deursnee moet voldoen. Terugvoering oor die ondersoek sal via die CBK gekommunikeer word.

      S van Zyl
      A Haasbroek

      Daar word besluit dat

      • die risikos aan die gebruik van teruggehoude saad tydens die volgende vergadering verder bespreek sal word;
      • daar gereël sal word dat 'n verteenwoordiger van SANSOR by die gesprek teenwoordig kan wees.

      Voorsitter

      Dit word rapporteer dat die organiseerders van die canolakompetisies dit oorweeg om nie weer die ontleding van die olie- en ru-proteïeninhoud by die kompetisie se verslag in te sluit nie, omdat die verskillende laboratoriums se resultate nie altyd ooreenstem nie. Die Voorsitter sê dat die PNS van die situasie ten opsigte van die verskillende resultate bewus is en in die proses is om die saak aan te spreek. Daar word deur PNS versoek dat die olie- en proteïenontledings wel by die kompetisie se resultate ingesluit moet word. Die Voorsitter onderneem om die saak met die mnre Van Rooyen en Slabbert op te volg.

      Daar word besluit dat

      • daar voortgegaan word om ontledings van die olie en proteïeninhoud van canola vir kompetisie doeleindes te laat doen;
      • die Voorsitter die versoek met mnre Van Rooyen en Slabbert sal opvolg;
      • PNS terugvoering na aanleiding van onderhandelings oor die feit dat verskillende laboratoriums se resultate nie altyd ooreenstem nie, sal rapporteer.

      Voorsitter
      Mnr Van Rooyen
      Mnr Slabbert

    8. Navorsingsprojekte 2007/2008

      Neem kennis dat die lys van goedgekeurde navorsings­projekte vir 2007/2008 by die sakelys aangeheg is. Die projek van die DLWK "The establishment and development of an on-farm cropping systems research site in the Protem area of the Southern Cape" nie sal voortgaan nie.

  8. Tegnologie-oordrag

    1. Canolafokus

      Die jongste uitgawe van die Canolafokus het in Maart verskyn. Neem kennis dat die volgende sake vir publikasie in komende uitgawes oorweeg sal word:

      • Artikel oor stikstofbemesting - Prof Agenbag/US student;
      • Artikel volgens inligting in vlugskrif deur mnr C Cum­ming oor insek- en onkruidbeheer (Mnr Agenbag sal die inligting aanvra);
      • Ander inligting uit 2006 reeks radiopraatjies.

      Redaksie

      Daar word ook aanbeveel dat Mnr Agenbag in oorleg met dr K Laubscher (navorsingsprojek by DLWK) die moont­likheid oorweeg of en hoe 'n samevatting van die inligting wat uit die streke aan hom voorsien word byvoorbeeld oor die vlugte van ruitrug- en bolwurm­motte as voorkomings­maatreël gepubliseer kan word of aan produsente gekommunikeer kan word.

      Besluit dat mnr Agenbag die saak verder sal opvolg.

      Mnr Agenbag

    2. Lupino

      Die jongste uitgawe van die Lupino het in Maart verskyn. Insette ten opsigte van verdere uitgawes word afgewag.

      Almal
      Redaksie

    3. Inligtingsdae 2007

      9-11 Augustus Canolafees, Swellendam
      10 Augustus CBK Boeredag, Swellendam
      22/23 Augustus Besigtiging van canolaproewe
      29-31 Augustus Agri Megaweek, Bredasdorp
      13 September Riversdal Boeredag
      19 September Overberg Agri Boeredag (Roode­bloem)
    4. Registrateur Wet 36 (Fertilizers, Farm feeds, Agricultural remedies and Stock remedies Act)

      Mnr McDermott deel die vergadering mee dat daar geen noemenswaardige vordering insake die aanstelling van 'n toksikoloog en vertragings met die afhandeling van registrasies van chemiese middels rapporteer kan word nie. AVCASA sowel as GSA bly met die Registrateur van Wet 36 hieroor in verbinding.

      Besluit dat enige vordering ten opsigte van die sake wat deur die chemiese en landbou bedrywe met Registrateur van Wet 36 opgevolg word, rapporteer sal word.

      Mnr Cumming

  9. Behoeftes van

    1. Mark – Canola

      1. Statutêre Graderingsregulasies

        Neem kennis dat die Kwaliteitstandaarde Komitee (De­partement Landbou) aangedui het dat hulle weens 'n gebrek aan kundigheid en kapasiteit nie voor 2008 aan die aansoek vir statutêre regulasies vir canola aandag kan gee nie.

        Besluit dat terugvoering insake die aansoek vir statutêre graderingsregulasies vir canola deur GSA opgevolg word en vordering rapporteer sal word soos die proses ontwikkel.

        Mnr Van Zyl

    2. Produsente – Canola

      Geen verdere inligting is beskikbaar nie.

    3. Produsente – Lupiene

      Geen verdere inligting is beskikbaar nie.

  10. Saad

    1. Saad – Canola

      Neem kennis dat alhoewel daar nie meer van alle cultivars se saad beskikbaar is nie, daar in totaal voldoende saad vir die seisoen beskikbaar is.

    2. Saad – Lupiene

      Daar word rapporteer dat voldoende saad beskikbaar is.

  11. Ander sake

    1. Studietoer na Australië

      Die volledige verslag van die studietoer na Australië was ter inligting by die sakelys aangeheg.

      Daar word kennis geneem dat die Australiese Regering 'n vyf-jaar moratorium op die ontwikkeling van GMO gewasse geplaas het. Daar word nie voorsien dat die PNS nou biotegnologie navorsing sal finansier nie. Die bedryf bly egter met die Australiese eweknie in verbinding en enige veranderings / vordering sal rapporteer word wanneer nodig.

    2. Inligting vir plasing op die PNS-webtuiste en nuusbrokkies

      Neem kennis en besluit dat lede enige nuuswaardige inligting / artikels aan die PNS kantoor moet deurstuur sodat dit op die PNS Webblad gepubliseer kan word. Voorbeelde: weervooruitskatting / risikos verbonde aan teruggehoude saad / voorkoms van en voorsorg teen someronkruid soos kanferbossie in Swartland / waar­nemings van motvlugte (ruitrug- en bolwurmmot).

      Almal

      Die vergadering oorweeg die moontlikheid dat inligting (waarskuwings) wat vir produsente belangrik mag wees byvoorbeeld voorkoms van 'n pes of plaag dringend per sms aan hulle gekommunikeer moet kan word.

      Daar word besluit dat

      • CBK en landboubesighede versoek word om 'n databasis van die canolaprodusente in die Suid- en Wes-Kaap saam te stel sodat dringende inligting vinnig aan produsente gekommunikeer kan word.

      Mnr Van Zyl
      Mnr Koch

    3. Inkomste- en kosteramings

      Neem kennis dat die jongste Inkomste- en kosteberamings soos deur die PNS saamgestel ter inligting by die sakelys aangeheg is.

    4. Prysmodel vir die berekening van die canola­prys

      Afgehandel onder punt 6.5 van hierdie notule.

  12. Datum van volgende vergadering

    • 13 Junie 2007
  13. Afsluiting

    Die vergadering word na 'n woord van dank aan elkeen afgesluit en verdaag.